ديل، ديلسيزليک، شعر
ديل، ديلسيزليک، شعر
محمد رضا لوایی
بئيين‌لر کؤچورلر. فضا کؤچور. ديل کؤچور. کؤچ ديلله‌نير . کؤچري‌لر ديل آچيرلار . ديلين کؤچو . کؤچون ديلي . بوقچالار باشقادير. بويورونوز افنديم آچينيز ديلي. بيز آذربايجاندا، سيز آلمانيا، فرانسا کانادادا ايچينيز ديلي. ديل هر شئيين مزه‌سي ،هر شئيين تزه‌سي . هله تارتيشماميز داها اينجه. سنجه مدرن‌ليگين ديلي،منجه ديلين مدرنليگي. کؤچري ادبيات بيزي گؤسترير يل بيزه سولطان ساييلير؟ بو ادبيات خالقين نؤکري‌ديريا خالقين باش اثري؟شوبهه‌لر آرتير.ايچري‌ايله ديشاري چکيش-برکيش زوروندا . اورادا غوربت ادبيات‌دير. بورادا ادبيات غريب دير. اورادا مدرن يازيرلار.بورادا يازارلار مدرن‌دير. بلکه‌ده ترسينه دئمک اولار.هر شئي دووار.جاوابلار هله يارنماييبلار. سورغولار يئرينده . کؤچن ائليته‌لر دونيايا فيکيرله‌شه‌رک دونيا ياراديرلار . ديشاريدا ديل هر بولاقدان کؤک آلير. ديل گوجله‌نيب بوي آتير. قونشو- قارداش ديللر ديله داياق دورورلار. دونيا ادبياتي ديل قوجاغيندا حلله‌نير. آما بو ديرچليش يونگول باخير. دوروم بئله‌جه آخير. نه دن؟ايستر کؤچ چانتالاريندا ، ايستر وطن باخچالاريندا غاليب ديل آت چاپديرمادا. ديل يئييلير. آز قالير بونو ايناناق کي ديلي شعر ايله نثر ساخلامايير بلکه اونو آراچلار گوجلنديرير. شئي‌لر ديله عؤمور وئريرلر. تکنولوژي ديل يارادير.اينترنت،سينما،فيزيک و…اونونچون کيچيک ديللر اؤزلريني قوروماق ايسته‌ييرلر. خصوصي ايله اوچونجو دونيا اؤلکه‌لرينده ديل اؤزونو شعر ايله گؤسترير. شعر بو اؤلکه‌لرده – ادبيات باخيميندان – مرکزده دير. شعر،ديلسيزليک دونياسي اولاراق ،غاليب ديللر اؤزونده بوغور. اونونچون ايچيريده هابئله ديشاريدا يازارلاريميز شاعيرديلر. نثر، گوجسوزلوک‌دور. ياني اساسدا قووملارين ديل ، شعر ديلي‌دير. او قدر کي اؤيکونو ديل يارادار شعري ديلسيزليک بئجريب گؤسترر. او.نونچون ايستر ايچيريده ، ايسترسه ديشاريدا يالنيز شاعيرلرياراتماقداديلار. آما همين ياراديليش ديلين چئشيدلي – بعضا تضادلي – ايشلم‌لرينه سبب‌دير. حاکيم ديلين اؤنونده و اونونلا کيچيک ديللرين آتيشماسيندان ايکي اساسلي مؤوضوع اوزه چيخير. قوناق ديل ائو صاحيبينين ديلي بير بيري ايله اوز اوزه گلنده ده بو قاورام بلله‌نير. بيز بير طرفدن ديلين اوست قاتلاريندا کي او لاي لارا شاهيديک باشق طرفدن اؤزگه ديلين درين‌ليگينده‌کي قورولوشلار يئني دگيشيک‌لره باعيث اولورلار. بونلاردان علاوه ايچري ايله ديشاري بير درده صاحيب‌ديلر. اونلار ديل ائويندن کؤچوبدولر . بونلار ديل ائوينين داغيلماق قورخوسونو ياشاييرلار. دئمک هر ايکيسي‌ده ديلين گوجلنمگينه يوخ بلکه نفس چکمگينه فيکيرله‌شيرلر. بو سهودير. ديلين گوجلنمک دغدغه‌سي بيزي ياراديليشدان قوياجاقدير. آما چاراميز يوخدور. بيز او اوچونجو ديله ائحتياجيميز وار . فيکيرسيز ،خيالسيز ،دردسيز فضالاري ديلده ياراتماق. بونو يازارلار يارادا بيلمزلر. بو ايش ايقتيدارلا توپلوملاردان آسيلي‌دير.کولتورلرين نئجه اولدوغوندان آسيلي دير. آچيق کولتورلر بو فضالاري باشقا ديللره باغيشلايا بيلرلر آما باغلي کولتورلر باشقا کولتورلري گونو-گوندن چئينه‌ييب اوداجاقلار. ديل ائويندن کؤچن شاعير،يازار ايلگيلردن قيريلاراق يئني ايلگي‌لر آرامادا ديلي ديدرگين‌ليک يوکونه چئويريرلر. کئچميش دونياني يئني‌دن جورله‌مک ،تزه دونياني دوشونمک . اونلار اصلينده غوربتدن غوربته کؤچوبدولر. بو داها چتين . ياني يئني بير دهشت متن‌لري ،اوخوجونو ،يازاري بورومکده‌دير. ديل اؤز ائوينده غريب‌دير. سياست اويونلاري ،حاکيم کولتورلر ،حاکيم ديللر بو غوربته سبب اولموشلار. ديلين غوربتي ،شعريميزه ،نثرلريميزه ،دولانيشيغيميزا ايز بوراخيبدير.شعر غوربت ،يازيچي غوربت ، اوخوجو غوربت ،بو باشقا دهشت . ايستر ديشاري ادبياتيميزدا ايسترسه ايچريده غوربت شعريميزين اؤزلليگينه چئريليب‌دير!دوزدور اؤزلليگينه .غريبليک ايليگه قدر ايشلنميشدير. سانکي غوربت شعردن گؤتورولسه ، شعر هاوادير. بو غوربت مدرنليک غوربتينه قاريشاندا داها غريب! آما سؤز بوردادير. ديلين غريبليي يا غريبليگين ديلي ؟؟ ايجتيماعي دارانيشيميز بونو گؤسترير کي ديل غريب‌دير. خالقيت دانيشيغي حاکيم ديله ياخينلاشير . ديالوگ ،گرامر حاکيم ديلي ادا ائدير. اولوس ايستر- ايسته‌مز حاکيم ديلين قوجاغينا سيخيلير. ائليته‌لرين ،يازار و شاعير داورانيشي آما غريبليگين ديلي دير. اونلار ديلليريني باکير ساخلاماقلا بير شئيه ده فيکيرله‌شير. خالقين ديل باکير ياشاسين. ائليته‌لرله اولوسون آراسيندا آيريليق وارسا بو ايکي اساسدان آسيلي‌دير. اولوسون ديلي غريب دير ائليته‌لرين ديلي غريبليک! بو آنلام کؤچري و باشقا اؤلکه‌لرده ياشايان خالقيميزين حاقيندادا دوزدور. اورالاردا ديل قوناق‌دير. قوناقدا ائو صاحيبينين دوه‌سي ! فضالار عيني‌دير،رساملار باشقا. ديشاري ديليميزله ايچري ديليميز بير دير يا بير دئييل ؟ ديشاري شاعيرلر گوجلودور يا ايچريده‌کي‌لر؟ادبياتيميزين ديل داورانيشي بو سورغولاري جوابلايير. ديلسيزليک ،اودا شعرده . ياشامي سرحدسيزاولان خالقين طبيعي کي ديلي ده سرحدسيزدير. اونونچون دونيا ديلينه ياخيندير شعريميز. سرحدسيز بير دونيا . بيز هر ديله چئوريله بيلريک.بو دا ديليميز. ديليميزين ديرنيشي بوندان آسيلي‌دير. گوجو بوندادير. شعريميزين ديلي ديلسيزليک‌دير،خالقيميزين ديلي سوکوت. گونئي‌ده کي آخيم ديلسيزليک آخيمي دير.
Posted by Duman birliksevən at 7:20 ÖS::
--------------------oOo--------------------
0 Comments:
Yorum Gönder
<< Home