ستارخانین 92-جی شهادت ایل‌دؤنومو قطعنامه‌سی
اولو تانری‌نین آدیینان
آياقلا تورپاغين اؤپوشمه سيندن
دوغولوب بؤيويور يوللار حياتدا
تاپدانا ـ تاپدانا مين ايللر بويو
يوللار عؤمور سورور آياقلار آلتدا
گليملي ـ گئديملي يول نسيللرين
اؤلمز عابيده‌سي، امانتيدير
تاپدانماق ـ انسانين شرفسيزليگي
تاپدانماق ـ يوللارين لياقتیدیر
انسان قدمينه تامارزي قالماق
يوللارين باغرينا چكيلن داغدير
دونيادا آياقلار آلتدا ياشاماق
بيرجه يوللار اوچون آلچالماماقدير
بو گون 1385-جی ایلین، چایان (آبان) آیی‌نین ٢٥-ی، میللی سرداریمیز، ستارخانین شهادتی‌نین 92-جی ایل‌دؤنومودور قاباقکی ایللر کیمی آغیزدان آغیزا بیلدیریشلری یاییلان تؤره‌نین گؤزلری، قورولماغینی اونو اوره‌کدن سئونلرین اللرینن یول چکیردی آنجاق رسمی تریبوننان اؤلکه‌نین بودجه‌سی اللرینده اولانلار، آز زامانین ایچینده، آدی میللی رسانه اؤزو فارس دستگاهی‌نین تبلیغاتچی‌سی اولان رادیو- تلویزیوندا ستارخان آدینا تؤره‌ن قوردوقلارینی بیلدیردیلر بیز ستارخانینان او کیمی آداملار آدینا تؤره‌ن-قورولتای قورماغی قینامیریق آنجاق اونلارین آدیننان ترسه یارارلانماغی ده‌یرلندیرمیریک کئچن آیلاردا زامانی بللی اولان تؤره‌نین حاکیمیت گوجونه آرخالانیب اوستونه تؤره‌ن سالماق آلچاقلیقدان سونرا آلاهی بیر زادا اوخشامیر
ایندی آذربایجان میللتی‌نین مظلومیتی داها آرتیق گؤزه چارپیر نامیسلارین قوروماق اوغروندا چابالاییب جان وئردیگیمز آداما اوخشارلار، بیر باشی کسیلمیش تویوق کیمی ده او چابالاماقلاری ده‌یرلندیرمیرلر
ایندی ایران آدلی اؤلکه‌نین اوغروندا کسیلیب-آسیلماق، اؤلوم-ایتیم اولان یئرلرده، آذربایجانین حیالی میللتینه گئنیش مئیدانلار آچیلیر آنجاق او میللتین آغا کیمی یاشاماغی‌نی شووونیستلرین گؤزلری گؤتورمور
بیز، آذربایجان میللتی‌نین ایلکین حاقلارین ساوونانلار، زیندانلاردا شیرین جانلاریینان دیدیشن زاماندا بو تؤره‌نه قاتیلمیشیق
بیز بو ایلین خورداد آیی‌نین شهیدلری‌نین قانی قورومامیشدان اونلارین توتدوغو یولونو آردیجیل ائتمه‌گه بورایا ییغیشمیشیق
بیز اؤزلوگوندن چیخیب، اؤزلرینی دانانلاری دانلاماغا گلمیشیک
بیز کیمیک ؟
بیز ایرانلی‌لارا نئجه یازیب-پوزماق اؤیره‌دنلرین آردی‌ییق
بیز، یوز ایل بوندان قاباق، بوگون ایران آدلانان اؤلکه‌ده یاشایانلارا اؤزلرینه تصمیم توتماق اؤیره‌دنلرین تؤره‌مه‌سی‌ییک
بیز قاجار محروسه ممالیکینده مدرسه آچانلارین دیلداشلاری‌ییق
بیز بو اؤلکه‌ده سیاسال حزبلر قورانلارین یوردداشلاری‌ییق
بیز ایران آدلانان اؤلکه‌یه پارلمانتاریسمی گتیرنلرین بالاسی‌ییق
بیز بو اؤلکه‌ده ایلک روزنامه یازارلاری‌نین ائولادی‌ییق
بیز بیرینجی مدرسه‌لرده کتاب اوخویانلارین قیزلاری-اوغلانلاری‌ییق
بیز ایرانا چؤرک وئریب، اؤزوموزه چؤرک دالییجاق ایران آدلی اؤلکه‌یه یاییلیب، عائیله‌میزی آللاها تاپشیرانلاریق
بیز آتالی-بابالی، یئرلی-یوردلو اؤزوموز تورک اولوب اوستوموزه گوجونن آذری آدی قویولانلاریق
بیز آنادیلیمزی سئویب او دیلده یازیب-اوخوماق ایسته‌ینلریک
بیز آنادیلیمزده بالالاریمیزی دیندیرمه‌گیمیز یاساق اولانلاریق
اونا يانيرام كي، بورلا خاتونون
روحو آلوولانار، مزاري اينلر
ايندي بالاسينا لايلا چالانمير
آناليق تاختينا چيخان گلينلر
بیز آنایاسانین یوللاندیریمالسی‌نی ایسته‌ینده، او آنایاسانی یازانلار طرفیندن موحاکیمه اولانلاریق
بیز مین ایللر بویو تاریخ یاپیب، اؤز تاریخیمیز اؤزگه‌لرین الینن یازیلانلاریق
هانسي حيله‌لردن سوايچير قلم؟
يئنه اورتاليغا نه سير دوشوبدور؟
نئچه يوز ايلليگيم، نئچه قرينه‌م
ساختا بئيينلرده اسير دوشوبدور !
يازانلاري كيمدير، پوزانلاري كيم؟
دوغرونون يئرينده يالان بيتيبدير؟
قهرمان كئچميشيم، اولو تاريخيم
قلملر الينده قتله يئتيبدير؟
بیز بو اؤلکه‌ده قادینلارا سس وئرمه حاققینی تانییان بیرینجی آداملاریق
بیز اؤز دیلیمیزده تحصیل آلماق ایسته‌ینده تجزیه‌طلب ساییلانلاریق
بیز آذربایجانلی‌ییق
بیز تورکوک
:ایسته‌کلر
الف - بیزیم دیلیمیز (آذربایجان تورکجه‌سی) ایران آدلی اؤلکه‌ده یاشایانلارین یاریسیندان چوخونون دانیشدیغی دیلیدیر بو دیل رسمی اولسون
ب - بیزیم اؤزوموزه گؤره کولتوره‌ل، سوسیال، اقتصادی و سیاسال دوغال حاقلاریمیز وار بو حاقلار رسمیته تانینسین
ج - اؤلکه‌نین بودجه‌سی ایراندا یاشایان میللتلره گؤره آربا پایلانسین
د - اقتصادی-فرهنگی پروژه‌لر یوللاندیریلاندا اؤگئی-دوغمالیق اولماسین
ه - ده‌ییشیلمیش یئر آدلاریمیز قایتاریلسین
و - خورداد آیی‌نین اولایلارینا گؤره حقیقت‌یاب کمیته قورولوب، شهیدلری‌نین قاتیللریینن یارالالانلارین عامیللری مجازات اولونسون
ز - آذربایجان اوغروندا چالیشان زیندانیلر، اؤزو ده خورداد تظاهوراتینا گؤره توتولانلار، عباس لئیسانلی، اکبر آزاد، حسن دمیرچی، عسگر اکبرزاده، رضا عباسی و بونلار کیمی آلاهی زیندانیلر آزاد اولسونلار
ستارخانین 92-جی شهادت ایل‌دؤنومو تؤره‌نینه قاتیلانلار
25/8/1385
16/11/2006
25/8/1385
16/11/2006
Posted by Duman birliksevən at 7:25 ÖS::
--------------------oOo--------------------
0 Comments:
Yorum Gönder
<< Home