روزنامه میزین دیلی

نئچه گون اونجه بیر کولتورال ده رنه یه ( کانون فرهنگی ) گئتمیشدیم ٬ سوزون دوزی من آغزیمی آچیب دانیشماق ایستییه ن زاماندان بیر نئجه نفر باشلادیلار پیچیلداماغا و بیر بیر لرینین گولاغلارینا بیر سوز لر دئمگه ... هر حالدا منیم سوزلریم گوتولاندان سورا گوله گوله دونوب منه ده دیلر کی سن نن جور تورک سن کی سوزلرینین چوخی فارس کلمه لردن تشکیل تاپیبدی ... او زامان آنلادیم کی او آدملار منیم سوز لریمین آنلامینی دوشونمه میش و ساده جه بیر ادبیات اوستادی تک دانیشیخ غلط لریمی یاد دا ساخلایبلار ...

اوزومی یوخاریدا گورمک مقصدیله دئمیرم اما یقین ائدیرم کی او آدملار... هیچ بوراخ ...

بئله آداملار میلی حرکته یاردیم ائدمیللر کی هیچ بلکه منیم کیمی آداملاری دا بو حرکتدن اوزاخلاشدیریللار.

ایشیم یوخ کی منیم کیمی آدملار اوز الکن دیللریله نئچه نفری حرکته ساری گه تیریب و اولار کیمی ادیب لر نئچه نفر لری حرکتدن اینجیدیب و قاچاخ سالیب لار٬ بو اوزدن " میر جعفر پیشه وری " نین بیر یازیسنسی کی بو موضوعلا ایلگیلیدی سیزلره و البته اولارا ( ادیب قارداشلاریما ) تقدیم ائدیرم ...

روزنامه میزین دیلی

روزنامه میز آذربایجان دیلینه آرتیق اهمیت ویره جکدیر. دیلیمیز دشمنلرین بوش ادعالارینا بأخمایاراق چوخ گنیش و غنی بپر دیلدیر. اونون ریشه سی خلقیمیزین قانیندا و اوره گینده دیر.

‏بپز اونی آنا سودی ایله امیب وطنیمیزین روحنواز هواسی ایله تنفس ایتمیشیک اونا توهین ایدنلر٬ ‏اونی تحمیلی و مصنوعی گوسترمک ایستینلر بیزپم حقیقی دشمنلریمیزدیر.

‏چوخ خائن و اجنبی عنصرلر قرن لرایله بو گوزل دیلی اورتادان قالدیرماغا چالیشمیشلار. اونون ترقی سینه و یاشاماسپنا مانع اولما ق مقصدیله مخصوصا ان غدار آزادلیق دشمنی اولان رضا خان دولتی وارقوه سپنی صرف ایتمیشدیر. بونونلابئله او سارسیلماز و محکم بپر حالدا خلقین ایچریسینده باقی قالیب ئوزمقامینی ساخلامیش بو واسطه ایله مدنی ومترقی بپر دیل اولدوغی اثباته یتیشمیشدیر.

‏آذربایجان دیلی دیمی بیر دیل دگیلدیر، اونون بویوک خلق، گئیش جماعت قوه سی کیمی آرخاسی واردیر. دیلیمیز خلقین یاراتدیغی داستانلار٬ ضرب المثللر٬ حکایه لر و نقللر دنیانین ان بویوک دیللری ایله رقابت ائده بیلر٬ شاعرلریمیز ٬ ادیب لریمیز بو دیل واسطه سی ایله ئوز احساساتلارینی و ئوز هنر و صنعتلرینی وجوده گتیریب خلقین نظرینی جلب ائده بیلرلر.

بیزیم وظیفه میز اونی گئنشدیرمک ٬ اونو معاصر حالا سالماق ٬ اونون گوزه للیک لرینی ٬ اینجه لیک لرینی و آنیتینی توز – تورپاق آراسیندان چیخاریب تمیز و عالی بیر ظرف ایچه ریسینده خلقه تقدیم ائتمکدن عبارتدیر.

آذربایجان دیلی او قدر قوتلی و انون صرف و نحو قایدالاری او قدر طبیعی دیر کی ٬ حتا اونون ایچینه وارد ائدیلمیش فارس و عرب کلمه لری اخراج ائدیلسه بئله اونونلا بویوک فکرلری ٬ عالی مقصد لری یازیب ٬ شرح وئرمک ممکندیر . لاکین بیز خلقین استعدادینی نظره توتوب بو ایشی ناگهان بیر صورتده گورمگه احتیاج حس ائتمیریک.

عقیده میزه گوره یازی گره ک خالقین دانیشدیغی و آنلادیغی بیر شیوه ده ادامه تاپسین . مقصدیمیز ادبی مسابقه دگیل ٬ خلقی باشا سالماق ٬ اونا حقیقتی آشکار بیر صورتده گوسترمکدیر . او جهتدن بیز خلق طرفیندن قبول ائدیلیب استعمال اولونان عرب و فارس کلمه لرینین موقتی اولسا بئله ساخلاماق لوزومونی انکار ائتمیریک . لاکن ٬ اونلاری ئوز دیلیمزین قایدالارینا تطبیق ائدیب آهنگینه اویغون بیر حالا گتیرمه لییک.

دنیادا بیر دیل تاپیلماز کی او تمامیله مستقیل اولسون و قونشو دیللرین تاثیرینه دوشمه سین. بیزیم آذربایجان دیلی ده آذربایجانین تاریخی و جغرافی موقعینه گوره اجنبی دیللرین تاثیریندن کناردا قالمامیشدیر . ایستر – ایسته مز بیر چوخ بیگانه کلمه لر خلقیمیزین آغزینا دوشموش ٬ مرور زمان ایله ملی – لشمیشدیر . بیز دیلین تکاملیننی نظرده توتوب او کلمه لردن استفاده ائتمگی لازم بیلیریک . لاکن بوندتن سوء استفاده ائدیب دیل و یازینی غلیظ لشدیرمک ٬ وحشی و معناسی آنلاشیلماز کلمه لری حساباقاتماغا جداً مخالفت ائتمه لییک .

آذربایجان یازیچیلاری قبول ائتدیکلری بیر چتین و آغیر وظیفه نی ایمان و عقیده ایله ایفا ائتمکله دیلیمیزین گوزه لیگینی و انون ترقی و تکاملینی تامین ائده جکلرینه بیزیم جدی ایمانیمیز واردیر .

" آذربایجان " روزنامه سی

14 شهریور 1324 ه. ش . نمره 2